ქართული ოცნების ლიდერის მამუკა მდინარაძის მიერ 3 თებერვალს, პარტიის სხდომის შემდეგ, კანონმდებლობაში ცვლილებების დაანონსებას დემოკრატიის კვლევის ცენტრი ეხმაურება.

გავრცელებულ ინფორმაციაში ვკითხულობთ, რომ მმართველმა პარტიამ რეპრესიული პოლიტიკის კიდევ უფრო გამკაცრება დააანონსა.

"ქართული ოცნება უკიდურესად ამკაცრებს სანქციებს იმ ადმინისტრაციული ნორმებისთვის, რომლებსაც შაბლონურად, ყოველგვარი სამართლებრივი საფუძვლის გარეშე ბოლო რამდენიმე თვის განმავლობაში განსაკუთრებით აქტიურად იყენებს. მაგალითად, წვრილმანი ხულიგნობისთვის, ვანდალიზმისთვის, სამართალდამცავი ორგანოს წარმომადგენლის მოთხოვნის დაუმორჩილებლობის და მათი შეურაცხყოფისთვის, სასამართლოს შესასვლელების ბლოკირებისთვის და სხვა მსგავსი ადმინისტრაციული კანონდარღვევისთვის კიდევ უფრო იზრდება ჯარიმები და ასევე იზრდება ადმინისტრაციული პატიმრობის ვადა 15 დღიდან 60 დღემდე. ამასთან, აქციების ჩატარება იკრძალება დახურულ სივრცესა და შენობებში, მესაკუთრის თანხმობის გარეშე.

დაანონსებული ცვლილებების მიხედვით, ადმინისტრაციულ სამართალდარღვევად განისაზღვრება სახელმწიფო პოლიტიკური თანამდებობის პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც ასევე მძიმე სანქციები განისაზღვრება. ადამიანის უფლებათა ევროპული სასამართლოს მიხედვით, საჯარო მოხელეებსა და პოლიტიკური თანამდებობის პირებს ეკისრებათ თმენის განსაკუთრებული ვალდებულება, მათ შორის, სიტყვიერი შეურაცხყოფის მიყენების დროს. აღნიშნული ცვლილების განხორციელება სრულად უგულებელყოფს საჯარო მოსამსახურეებისა და პოლიტიკური თანამდებობის პირებისათვის დადგენილ თმენის ვალდებულების სტანდარტს, რაც სიტყვისა და გამოხატვის თავისუფლების უკიდურესი შეზღუდვით მიიღწევა.

გარდა ადმინისტრაციულ სამართალდარღვევათა კოდექსისა, ცვლილებების შეტანა იგეგმება სისხლის სამართლის კოდექსშიც:

• ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით, დაანონსებული ცვლილებებით ამ ქმედებისთვის განისაზღვრება პატიმრობა 3 წლამდე ვადით.

• მძიმე კატეგორიის დანაშაულად განისაზღვრება და, შესაბამისად, გაიზრდება პატიმრობის ვადა სამართალდამცავთა მიმართ წინააღმდეგობის, მუქარის და ძალადობისთვის.

• დამამძიმებელ გარემოებებად განისაზღვრება ჯგუფურობა და არაერთგზისობა და, შესაბამისად, გაიზრდება სასჯელის ზომა პოლიციელზე, ხელისუფლების წარმომადგენლებსა და მათი ოჯახის წევრებზე თავდასხმის დროს.

• სასჯელი მკაცრდება პოლიციელის ჯანმრთელობის ხელყოფის ფაქტზეც. სისხლის სამართლის კოდექსს დაემატება ახალი ნორმა და სისხლის სამართლის წესით დაისჯება პოლიტიკური თანამდებობის პირზე, სახელმწიფო მოსამსახურეზე, საჯარო მოსამსახურეზე თავდასხმის ან ძალადობის მუქარის ჩამდენი პირიც.

ქართული ოცნება კანონმდებლობის გამკაცრების გზით ცდილობს, უკიდურესად შეამციროს განსხვავებული აზრი ქვეყანაში. არაპროპორციული სანქციების, რომელიც სრულად ეწინააღმდეგება საქართველოს კონსტიტუციას, საერთაშორისო სტანდარტებსა და ევროსასამართლოს პრაქტიკას, მიზანია დანერგოს შიში განსხვავებული აზრის მქონე ადამიანებში. გამკაცრებული საკანონმდებლო ცვლილებების დაანონსება, მსუსხავ ეფექტს ახდენს შეკრებისა და გამოხატვის უფლებაზე. აღნიშნული პრობლემა კიდევ უფრო მწვავდება მიკერძოებული სასამართლოს პირობებში, რომელიც, განსაკუთრებით ბოლო პერიოდში, კანონით გათვალისწინებული სასჯელის მაქსიმალურ ზომას იყენებს დემონსტრანტთა წინააღმდეგ", — ნათქვამია გავრცელებულ ინფორმაციაში.